Diogelwch Ffyrdd Cymru
11/1/10
Mae grwp o blant ysgol wedi mentro ar yr iâ yng Ngwledd y Gaeaf ar y Glannau yn Abertawe, a hynny er mwyn diogelwch ffyrdd.
Enillwyr lwcus cystadleuaeth liwio diogelwch ffyrdd a drefnwyd gan Dîm Diogelwch Ffyrdd Cyngor Abertawe oedd y plant ysgol hyn o Flwyddyn 1 yn Ysgol Gynradd Llangyfelach.
Trefnwyd y gystadleuaeth fel rhan o'r fenter Kerbcraft a ariennir gan y Cynulliad ac sy'n darparu addysg diogelwch ffyrdd ymarferol i blant rhwng 5 a 7 oed.
Y wobr ar gyfer enillwyr y gystadleuaeth oedd cael eu trin fel VIPs ar Gylch Iâ Cochyn yng nghwmni Cochyn y Ceiliog Diogelwch Ffyrdd.
Meddai Mike Flynn, Pennaeth Ysgol Gynradd Llangyfelach, "Cafodd y plant ddiwrnod bendigedig a gwnaethant fwynhau eu hunain yn fawr gyda Cochyn.
"Mae cydlynydd Kerbcraft wedi bod yn gweithio yn ein hysgol am bum mlynedd yn helpu i drosglwyddo negeseuon diogelwch ffyrdd hollbwysig i'r plant.
"Mae'n gynllun gwerthfawr iawn a fydd yn helpu i roi'r sgiliau angenrheidiol i'r plant i'w galluogi i gadw'n ddiogel ar ffyrdd."
Mae'r cyngor yn gobeithio y bydd mwy o bobl yn gwirfoddoli i helpu i gyflwyno Kerbcraft mewn ysgolion ar draws Abertawe.
Meddai Carys Price, Cydlynydd Hyfforddi Cerddwyr sy'n Blant dros Gyngor Abertawe, "Menter bwysig iawn yw Kerbcraft a hoffem ei chynnig i bob ysgol yn y ddinas.
"Mae'r cynllun yn dibynnu ar gymorth gwirfoddolwyr a heb eu cymorth hwy, ni fyddem yn gallu darparu hyfforddiant Kerbcraft i'n holl blant ifanc."
Os ydych yn credu y gallwch helpu, ffoniwch Carys Price neu Lindsey Hill ar (01792) 636142.
18/12/09
Mae hyrwyddwyr diogelwch ffyrdd yn Abertawe wedi derbyn diolch Nadoligaidd arbennig gan Gyngor Abertawe. 
Mae'r gwirfoddolwyr lleol sy'n rhedeg menter diogelwch ffyrdd Kerbcraft y Cynulliad yn cael eu hanrhydeddu â chinio Nadolig fel gwobr am eu gwaith caled a'u hymroddiad yn ystod y flwyddyn.
Tîm Diogelwch Ffyrdd y Cyngor sy'n cydlynu'r cynllun ac mae'n dibynnu ar wirfoddolwyr i fynd i ysgolion cynradd i helpu plant rhwng 5 a 7 oed ddysgu am ddiogelwch ffyrdd.
Mae Kingsley McCarthy o Drefansel wedi bod yn helpu, gan ddysgu diogelwch ffyrdd mewn tair ysgol gynradd am y chwe blynedd diwethaf.
Meddai Kingsley, sy'n 73 oed, "Mae Kerbcraft yn gynllun mor hanfodol a gwerth chweil. Dyma un o'r ffyrdd y gallwn help i leihau nifer y damweiniau sy'n digwydd i blant ar ein ffyrdd.
"Fe gynigiodd James, fy ?yr, fy enw ychydig flynyddoedd yn ôl, a dw i ddim wedi 'difaru.
"Rydym ni'n cael amser pleserus a llawer o hwyl gyda'r plant ac mae pawb i weld yn mwynhau eu hunain. Mae gennym hefyd gân diogelwch ffyrdd arbennig rydyn ni'n dysgu i'r plant ar ddiwedd y wers.
"Rwy'n wir obeithio y bydd mwy o bobl yn gwirfoddoli oherwydd mae'n rhaid i ni barhau i gynnal y cynllun."
Dywedodd John Hague, Aelod Cabinet Cyngor Abertawe dros yr Amgylchedd, "Rwyf am ddiolch yn bersonol i'r gwirfoddolwyr am eu cymorth, yn ein helpu i gyflwyno addysg diogelwch ffyrdd i blant ledled Abertawe. Heb eu hymdrechion, fydden ni ddim yn gallu cynnal y cynllun.
"Rydym yn gwbl ymroddedig i greu amgylchedd diogel yn ein cymunedau yn enwedig ger ysgolion. Mae hyfforddiant Kerbcraft yn ategu'r camau ffisegol hyn ac yn sicrhau y bydd ein plant yn ddiogel ar y ffyrdd."
I wirfoddolir ar gyfer Kerbcraft a helpu plant i fod yn ddiogel ar ein ffyrdd, cysylltwch â Carys Price neu Lindsey Hill ar (01792) 636142.
24/11/09
Cafodd Sioned Richards ei phenodi yn Gynorthwy-ydd Hyfforddiant Cerddwyr Ifanc yn ddiweddar. Bydd yn gweithio gydag un ar ddeg o ysgolion cynradd newydd, gan ehangu rhaglen hyfforddiant lwyddiannus Kerbcraft i blant ym mlwyddyn dau.
Mae wedi bod yn gweithio gyda phlant ers iddi fod yn 16 oed a chwblhaodd ei gradd mewn Datblygiad ac Addysg Blynyddoedd Cynnar ym Mhrifysgol Morgannwg yn 2007.
Ar ôl pasio ei gradd, bu Sioned yn gweithio fel cynorthwy-ydd addysgu mewn sawl ysgol wahanol yn ne Cymru, swydd yr oedd wirioneddol yn ei mwynhau. Mae ganddi brofiad hefyd o weithio mewn cynlluniau chwarae ac â phlant ag anghenion arbennig.
Mae Sioned yn falch iawn o gael cynnig y swydd Cynorthwy-ydd Hyfforddiant Cerddwyr Ifanc ac mae'n edrych ymlaen at ddechrau!
Dyma yrfa yr oedd bob amser am ei dilyn.
Gellir cysylltu â Sioned yn y Ganolfan Diogelwch ar y Ffyrdd Ffôn: 029 2078 8526
2/7/08
 |
Yr actores Manon Ellis gyda disgyblion
Ysgol Glan Cegin, Bangor yn dysgu am
reolau’r ffordd fawr |
Cadw at reolau syml ond pwysig - dyna oedd y neges i ddisgyblion iau Ysgol Glan Cegin, Bangor yn ddiweddar wrth iddyn nhw dderbyn tystysgrifau diogelwch y ffordd fel rhan o gynllun Kerbcraft.
Wrth iddynt gwblhau rhan o gwrs cynllun diogelwch y ffyrdd Kerbcraft gyda chymorth Uned Diogelwch y Ffyrdd Cyngor Gwynedd, cafodd disgyblion Ysgol Glan Cegin ymweliad gan yr actores Manon Ellis sy'n chwarae rhan Michelle yn rhaglen deledu boblogaidd "Rownd a Rownd".
Ar ôl bod allan gyda'r disgyblion yn dysgu am y rheolau, cyflwynodd Manon Ellis y tystysgrifau i'r plant. Fel rhan o'r cynllun Kerbcraft, cafodd y disgyblion fudd o fynd allan o gwmpas yr ardal i ddysgu sut i gadw yn ddiogel ar ochr y ffordd, ac mae'r tystysgrifau yn cydnabod eu gwaith da.
Mae cynllun Kerbcraft yn dysgu plant 5-7 oed i gerdded yn ymyl ffordd yn fwy diogel drwy fynd â nhw ar ffyrdd go iawn a dangos iddyn nhw fod gwneud y penderfyniadau cywir, ac ymddwyn yn gywir, yn gallu eu helpu i fod yn ddiogel. Caiff y plant eu cymryd allan o'r ysgol, mewn grwpiau o ddim mwy na thri, gan wirfoddolwyr sydd wedi cael hyfforddiant.
Fel rhan o'r gwersi cynllun Kerbcraft, mae'r plant yn:
Dewis Lleoedd a Llwybrau Diogel i Groesi'r Ffordd
Caiff y plant eu helpu i adnabod peryglon a dod o hyd i leoedd eraill i groesi.
Croesi'n Ddiogel lle mae Ceir wedi'u Parcio
Caiff y plant eu dysgu i ddefnyddio strategaeth ddiogel i groesi yn ymyl ceir sydd wedi'u parcio - os bydd hi'n amhosibl eu hosgoi.
Croesi'n Ddiogel yn ymyl Cyffyrdd
Caiff y plant eu cyflwyno i broblemau cyffyrdd syml a chymhleth ac fe ddysgan nhw strategaeth i edrych yn systematig i bob cyfeiriad.
I gael gwybod rhagor...
13/5/08
Mae tÎm ymroddedig o wirfoddolwyr Castell-nedd Port Talbot sy'n helpu pobl ifanc i ddysgu am beryglon y ffyrdd, wedi bod yn dysgu hefyd. A nawr maent wedi derbyn tystysgrif ar Ôl cwblhau cynllun hyfforddi unigryw a ddatblygwyd yn y fwrdeistref sirol yn llwyddiannus.
Mae'r 15 gwirfoddolwr wedi bod yn astudio Sgiliau Plant sy'n Gerddwyr sy'n gyfwerth ag NVQ.
Datblygwyd y cymhwyster gan Gydlynydd Kerbcraft ar y cyd  Rhwydwaith y Coleg Agored a Gwasanaeth Dysgu Gydol Oes Castell-nedd Port Talbot ac mae'n unigryw yng Nghymru.
Mae cynllun Kerbcraft, sydd wedi bod yn gweithredu yng Nghastell-nedd Port Talbot am y chwe blynedd ddiwethaf, ar hyn o bryd yn cynnwys 29 o ysgolion a'i nod yw darparu hyfforddiant ar y ffordd i blant rhwng 5 a 7 oed.
Oherwydd eu llwyddiant gyda'r plant, cynigiwyd cyfle i'r gwirfoddolwyr ennill y cymhwyster, a nawr maent wedi derbyn eu tystysgrifau.
Meddai Joy Smith, Rheolwr Diogelwch Ffyrdd: "Rydym wrth ein boddau gyda chyflawniad ein gwirfoddolwyr.
"Rhoeson nhw eu hamser rhydd yn anhunanol i hyfforddi ein plant ifanc agored i niwed ac maent yn hapus ac yn llawen beth bynnag fo'r tywydd. Mae'r cymwysterau cenedlaethol y maent wedi'u hennill yn gwella ein cynllun Kerbcraft ymhellach ac yn gam bach i'w had-dalu am eu hymrwymiad a'u gwaith caled."
10/3/08
Cadw at rhai rheolau syml ond pwysig - dyna'r neges y mae cynllun diogelwch y ffyrdd, Kerbcraft yn ceisio ei rannu gyda disgyblion cynradd ar hyd a lled Gwynedd.
Dyna oedd prif neges mewn seminar arbennig a gynhaliwyd ym Mhorthmadog yn ddiweddar i ddathlu cydweithio rhwng Cyngor Gwynedd a Heddlu Gogledd Cymru wrth iddynt weithio i ehangu cynllun diogelwch y ffyrdd, Kerbcraft i fwy o ysgolion cynradd y sir.
Dywedodd y Cynghorydd R H Wyn Williams, Uwch Arweinydd Portffolio Cyngor Gwynedd:
"Plant heddiw ydy gyrwyr y dyfodol, ac mae'n hollbwysig ein bod ni'n rhoi'r cyngor gorau i'n pobl ifanc am y peryglon posib sydd ar y ffyrdd. Rydw i'n falch iawn fod tîm Diogelwch y Ffyrdd Cyngor Gwynedd yn gweithio gyda Heddlu Gogledd Cymru er mwyn rhannu'r neges bwysig yma gyda phlant ar hyd a lled y sir.
"Mae'r seminar yma wedi bod yn gyfle i ni ddod ynghyd i ddathlu'r hyn sydd eisoes wedi ei gyflawni fel rhan o'r cynllun, a chadarnhau ein hymrwymiad i weithio gyda'n partneriaid i addysgu plant Gwynedd am bwysigrwydd rheolau'r ffordd fawr."
Fel rhan o gynllun Kerbcraft mae plant yn dysgu am reolau'r ffordd fawr, megis dewis llefydd diogel i groesi'r ffordd a dysgu sut i groesi wrth gyffordd. Yn y seminar ym Mhorthmadog, cafodd ddisgyblion Ysgol y Gorlan, Tremadog gyfle i arddangos y sgiliau y maen nhw wedi eu dysgu fel rhan o'u gwersi ymarferol.
14/6/07
Yn ddiweddar, gofynnwyd i ddisgyblion Blwyddyn 5 yn Ysgol Gynradd Rhaglan alw i gof yr egwyddorion roedden nhw wedi’u dysgu bron i bum mlynedd yn ôl.
Pan sefydlwyd Cynllun Kerbcraft yn Sir Fynwy, nhw oedd rhai o’r plant cyntaf i gael yr hyfforddiant. A hwythau’n 5 a 6 oed, gofynnwyd iddyn nhw ble oedd dod o hyd i leoedd mwy diogel i groesi’r ffordd. Os nad oedd lleoedd felly ar gael, fe ddangoswyd iddyn nhw’r ffordd gywir i groesi’n fwy diogel wrth geir a oedd wedi’u parcio ac wrth gyffyrdd.
Y cwestiwn oedd a fydden nhw’n dal i gofio hynny i gyd ar ôl pum mlynedd? Rhoddwyd prawf ar aelodau o’r Tîm Diogelwch ar y Ffyrdd, Gwirfoddolwyr Kerbcraft ac, wrth gwrs, y plant eu hunain.
Y dasg a gawson nhw oedd dod o hyd i lwybr diogel drwy’r pentref ac yn ôl i’r ysgol ac arwain yr oedolion yn ddiogel ar hyd y llwybr hwnnw. Yn ogystal â mynd heibio i geir a oedd wedi’u parcio a chadw llygad ar y traffig, fe lwyddon nhw hefyd i achub ci bach a oedd wedi rhedeg allan o ardd ac ar fin rhedeg i’r ffordd. Drwy blymio’n ddwfn i gilfachau’r cof, fe gofion nhw’r holl egwyddorion roedden nhw wedi’u dysgu flynyddoedd ynghynt: fe lwyddon nhw i ddatrys problemau, asesu risgiau, cynllunio’u llwybr, a thywys yr oedolion yn ddiogel yn ôl i’r ysgol.
Camp a hanner!
4/6/07
I ddathlu pum mlynedd lwyddiannus o roi hyfforddiant Kerbcraft i blant sy’n cerdded, bu rhyw 1500 o blant o ysgolion Castell-nedd Port Talbot ar daith gerdded 2.5km o hyd o amgylch Parc Gwlad Margam.
Arweiniwyd y daith noddedig gan Henson Hedgehog, masgot diogelwch ar y ffyrdd Castell-nedd Port Talbot.
Mae bron 2,000 o blant lleol wedi cymryd rhan yn y cynllun hyd yn hyn, ac mewn digwyddiad cyflwyno yn Orenfa Margam cafodd pob un o’r 29 o ysgolion sydd wedi cymryd rhan yn y cynllun blaciau i’w hanrhydeddu. Ewch i Kerbcraft i gael gwybod rhagor amdano.
21/5/07
Ymunodd tri o swyddogion Cymorth Cymunedol Heddlu Gwent â Catherine Levy, Cydlynydd Kerbcraft Casnewydd, yn Ysgol Gynradd Gatholig Dewi Sant i helpu ymgyrch y Cenhedloedd Unedig i hyrwyddo Wythnos Fyd-eang Diogelwch ar y Ffyrdd.
Helpodd y tri swyddog, sef Lowri James, Jamie Cooper a Si Khan, i hyfforddi plant o ddosbarth Blwyddyn 1 drwy ddangos iddyn nhw sut mae dod o hyd i le diogel i groesi’r ffordd, sut mae croesi’n ddiogel wrth gyffordd, a sut mae croesi rhwng ceir sydd wedi’u parcio os nad oes lle diogel arall i groesi.
Meddai Catherine Levy, sy’n rheoli’r Cynllun Kerbcraft yng Nghasnewydd: “Roedd hi’n beth braf iawn cael cymorth y tri swyddog yn Ysgol Gynradd Dewi Sant, a gobeithio y gallan nhw fy helpu i fynd â’r cynllun gwerthfawr hwn ymlaen i ysgolion eraill yn ardal Casnewydd. Am fod Kerbcraft yn gosod sylfeini arferion da o ran diogelwch ar y ffyrdd, gall plant ddilyn yr arferion hynny weddill eu hoes.”
